Mai i Te Pari-nui-o-Whiti i te taha whakarunga huri noa i Te Waipounamu tae atu ki Kahurangi i te taha māuru ko tēnei te rohe o Ngāi Tahu. Ko Rakiura, kongā motu i te tino tonga hoki i tēnei takiwā.
Nō mai mai, he tino mahi te hī ika ki ngā hapori me ngā whānau o Ngāi Tahu.
I ora aua whānau i ngā mahi hī ika i ngā hāpua, i ngā whanga, i ngā wahapū, i te moana hoki. I ēnei rā tonu ko ngā mahinga ika he tino i te ao o Ngāi Tahu whānui.
"…ko ēnei kai ko tō tātou pātaka kai tonu. Ehara i te mea ko ēnei ngā tāpiritanga ki ngā mea ka hoko i te toa, hai kīnaki noa. E kāo, ko ngā mea hoko i te toa kē ngā tāpiritanga. I pēnei tō mātou whānau he tikanga nō mātou. Ko ōku mātua, ko ōku tīpuna i pēnei."
Henare Rakiihia Tau, Te Rūnanga o Ngāi Tūāhuriri.
Nō onamata he iwi mōhio a Ngāi Tahu ki ngā momo ika me ngā mahinga hī ika i Te Waipounamu. I a rātou ngā pātari, ngā haeana, ngā matau me ngā momo kupenga mā tēnā ika, mā tēnā mahinga ika. I toro ō rātou ringa ki ngā rākau a te Pākehā pērā ki ngā matau taratara rino, ngā hoe me ngā rōraka mō ngā poti whai wēra.
Ka hokohoko ika a Ngāi Tahu ki ngā hapū me ngā whānau o Ngāi Tahu tonu, ki iwi kē hoki. Ka kōtututia ika hai kai mā rātou, hai hokohoko hoki. Nō ngā tau 1830 ka hokohoko ika rātou ki ngā waka Pākehā, ki ngā teihana patu wēra, ā, i tukuna ngā ika ki Ahitereiria.
Background photograph courtesy of Canterbury Museum, Christchurch, New Zealand.
Permission of Canterbury Museum must be obtained before any re-use of this image.
