I piri mai a Joseph Thomas (Ngāti Mutunga o Wharekauri me Te Āti Awa) ki a Ngāi Tahu Seafood hei tumu whakarae mō te kamupene i Kai Te Haere, i tēnei tau 2016. He whānui, he whāroa ngā wheako o Joseph i roto i ngā mahi whakahaere me ngā mahi kāwana.
E pupuri, e manaaki ana a Joseph i ētahi kaupapa whakahaere: Te Heamana o Ngāti Mutunga o Wharekauri Asset Holding Company LTD, me he Taratī o Ngāti Mutunga o Wharekauri Iwi Trust.
Andreas Carrara, i piri a Andreas ki te kapa i te tau 2008 hei Kaiwhakahaere Arumoni. Kua koni atu i te 15 tau a ia e whai wheako arumoni ana, mai anō i te tīmatanga o tōna umanga ki Ōtautahi, nōna e mahi ana hei kaitātari kaute mā PWC. Nāwai rā ka mahi ia ki Peretānia mō ngā tau e rima neke atu, ki ētahi tūranga ahumoni ki ngā ahumahi rawa whenua, pēke pūtea, puoro hoki. He Tohu Paetahi Tauhokohoko, he Tohu Paetahi Pūtaiao hoki wā Andreas nō Te Whare Wānanga o Waitaha, ā, he mema tūturu hoki ia ki te ohu New Zealand Institute of Chartered Accountants.
Bill Udy, ko Bill te Kaiwhakahaere Tauhokohoko mō te Rohe ki te Raki, ā, ko tana aronga nui ko te hokotanga o ngā hua kaimoana totoka ki tāwāhi. Ko ia hoki te kaitakawaenga mā te hunga hao ika mō ō rātou roherohenga nō Ngāi Tahu. Ko Bill hei māngai mō Ngāi Tahu ki ētahi tini ohu e aro ana ki ētahi momo ika rerekē. Kua 25 tau a ia e whai wāhi ana ki te ahumahi kaimoana, ā, ko te nuinga o āna mahi e pā ana ki ngā mahi hoko, whakatairanga, whakahaere hoki. I waho atu i te mahi, he pārekareka ki a Bill te omaoma, te kake pahikara piki maunga me te hīkoikoi.
Ken Gray, ko Ken te Kaiwhakahaere ā-Motu i ngā Hokonga ki Aotearoa, ko ia hoki te Kaitakawaenga ki te Hunga Hao Ika i te Rohe ki te Tonga, ā, kua 11 tau a ia e piri ana ki Te Pou Kaimoana o Ngāi Tahu. I mua atu, i whai wāhi kē ia ki te ahumahi whakauwhi mō ngā tau 30, ā, e whakapono ana ia he āwhina nui tērā ki ana tūranga e rua i tēnei wā, mātua rā ki ana pūkenga mahi tahi ki te tangata, me te taka kai anō. Ko Ann te hoa rangatira o Ken, ā, tokorua ā rāua tamariki, tokowhitu anō ā rāua mokopuna. Ka purei pīrori maita ia ki te karapu rangatira o Belfast Club, ā, he pai hoki ki a ia te purei Hahaupōro hei mahi ngahau noa i ōna wā.
Thomas Hildebrand, ko Thomas te Kaimātai Koiora Moana tuatahi rawa kia whai tūnga mahi ki Te Pou Kaimoana o Ngāi Tahu. I tipu ake ia ki Motupōhue, ā, kua whai mahi ki te ahumahi hao ika mai i te wā he 14 tau tōna pakeke, ki ētahi whare whakatikatika, ki te ruku pāua, ki ētahi pāmu ahumoana hoki. I hūnuku a Thomas ki Ōtautahi kia kuraina ai ki Te Whare Wānanga o Waitaha, ki reira tutuki ai i a ia tana tohu paetahi ki te mātauranga koiora, ā, inā tata nei ka puta tana ihu me tana tohu paerua. Nōna e ako ana i whai wāhi ia ki te Pokapū Rangahau o Ngāi Tahu, ā, i tae hoki ki tētahi hui First Nations Future ki te Whare Wānanga o Stanford.
